حكمة اليوم

موتور سيارة مفروط

الحكمة: عقد بساطك مد اجريك

الى: المكانسيان اللي حدنا

السبب : التمعلم على شركة الهوندا و قطع شرطان في التابلو عبو جنب لان ما الن فايدة و السيارة بتمشي بلاهن.

جرّب

اوقات بتمرق حد عالم هيك رايقين كتير ابعد شي عن المشاكل هني اللي بيقولو عنن بيمشو الحيط الحيط … هول العالم بتطلعلن بطريقة غريبة, خاصة ازا انت بتعتبرحالك حربوق و طحّيش .. لمابتشوفن بتقول بقلبك يا حرام شو بسيطين .. شو في شغلات بالحياة رايحة عليهن .. عالم بينامو بكير و بيفيقو بكير .. عالم اغلب الاوقات بيكونو موظفين و بيضلو موظفين … هو اللي بيمشو عاليمين عادة.. انت و هلقد شايف حالك انو انت كتير مميز و لزيز, ما تنسى انو يمكن يكونو مبسوطين اكتر منك. الهدف اللي براسن غير الهدف اللي براسك يمكن هني بينبسطو لما ينامو بكير اكتر ما انت بتنبسط لما تسهر. يمكن انت بتعتبر حالك مجرب كل شي.. بس اكيد في شغلات انت مش مجربا كمان.. انت مش مجرب يكون راسك مرتاح و مش عم تفكر بمليون شغلة انت و عمتاكل مثلا و مش مجرب شي مرة تكون باستقرار لتعرف تاني يوم شو حتعمل.. كمان هو شغلات حلوة.

فبلاها هالشوفة الحال بيكون احسن

الحب

خلينا نحكي شوي عن الحب .. ما بعرف قديش فينا نلاقي عالم بيتفقو عمفهوم واحد للحب. و ما بعرف ليه اول شي خطر عبالي مشهد من مسلسل مصري, بتكون بنت بتسأل فيه رفيقتا ” هو ايه الحب؟ ” قبل ما تجاوبا بتطلع فيها و بتغمض عيونا نص تغميضة و بتبلش تحكي … بغض النظر ليه تخايلت هالمشهد, بس ليه هيك مطبوع بمخنا انو الحب هو شي مخدّر او شي حشيش, ولا مرة بحياتي حبيت او بلشت حب الّا ما صرت اخوت.. ولا مرة شفت شي رفيق عشقان و هيك سهيان او مغمّض نص تغميضة, بالعكس. الحب هو قوة مش ضعف, هو امل, و تكامل, و مليون شغلة حلوة, و هو اول شي جنون .. و اكيد هو مش شي حكر عالسبعينات ..